250 մլն եվրոյի վարկ` Հայաստանի բյուջեի պակասուրդը ֆինանսավորելու համար
Նարե Վահանյան
Հոկտեմբերի 1-ի կառավարության նիստի օրակարգում ներառված է Զարգացման ֆրանսիական գործակալությունից (AFD) բյուջետային վարկ ստանալու մասին համաձայնագրի նախագծի հարցը։ Ըստ համաձայնագրի՝ Հայաստանի այդ գործակալությունից 250 մլն եվրոյի վարկ կստանա։
Ֆրանսիական վարկը AFD-ի և Ասիական զարգացման բանկի (ADB) կողմից համաֆինանսավորվող եռամյա ծրագրի առաջին ենթածրագրի մաս է։ Հայաստանի կառավարությունն այս գումարը, նաև մինչև 250 մլն դոլարի համաֆինանսավորում ADB-ի կողմից, ուղղվելու է հանրային ֆինանսների և պետական պարտքի կառավարման, ֆինանսական շուկաների և մասնավոր հատվածի զարգացման ոլորտներում բարեփոխումներին։ Կառավարության պնդմամբ՝ ծրագրի նպատակներից մեկն էլ այն է, որ Հայաստանն արտաքին ֆինանսավորումից կախվածությունը նվազեցնի։
Սակայն մինչև բարեփոխումներն ու կախվածությունների նվազեցումը՝ այս վարկն ուղղվելու է 2026 թվականի պետական բյուջեի պակասուրդի ֆինանսավորմանը։
Վարկի մարման վերջնաժամկետը 2046 թվականն է։ Առաջին 5 տարին կլինեն արտոնյալ, իսկ դրանից հետո՝ 15 տարվա ընթացքում մայր գումարը կմարվի տարեկան երկու անգամ՝ հավասարաչափ մարումներով։ Տրամադրվող վարկի տոկոսադրույքի վերաբերյալ տեղեկություններ չկան։
